მარტი გავიდა, გათბა დღე,
დარები დგება მზიანი,
მიწა გაფუვდა, ბუჩქებში
ამოჩენილან იანი.

მოფრინდა გვრიტი, შოშია,
ოფოფი სავარცხლიანი;
მწვანედ ბიბინებს მინდორი,
ოლე და ველი ცვრიანი.

ჭუკჭუკებს დილა-საღამოს
ახლად მოსული მწყერია,
თავს ძლივს იმალავს ჯეჯილში
ჭიაღუების მტერია. Read the rest of this entry »

ცეკვით, სიმღერით,
სიცილ-კისკისით
მომილოცია
ახალი წელი!
მომაქვს ციგები,
მომაქვს გუნდები,
მაჭახელების
ჭახან-ჭახანი!
მაღალი ნაძვის
მწვანედ ღაღანი,
მწვანე ნაძვივით
რწმენა მაღალი,
რომ ამ მიწაზე
აღარ იქნება
წყარო დამშრალი,
ნერგი გამხმარი.
გულს გაგვიხარებს
შრომის სიმღერა,
წარმატებები
ახალ-ახალი
და საქართველო
გახდება მალე
მართლაც ზღაპრული
მხარე ბაღნარი

ავტორი: გივი ჭიჭინაძე

თოვლმა უცებ დაბურა
მინდორი თუ კორდი,
თოვლის თეთრი ბაბუა
საჩუქრებით მოდის.
ათასფერად ბრიალებს
ჩვენი ნაძვის ხეო.
დადგა მღერა-სიცილით
ახალი წლის დღეო.

ავტორი: ანზორ აბულაშვილი

ამ პატარა ლოკოკინას
ნეტავ, ზურგი არ ეტკინა?

სულ არ იცის, რაა დაღლა,
სახლს დაათრევს აღმა-დაღმა.

გულღიაა და კეთილი,
კარი არ აქვს დაკეტილი,

ღიას სტოვებს, განა რჩება –
შიგნით მაინც ვერვინ შევა,

თუ ეწვია სტუმრად ვინმე,
გარეთ უნდა გამოვიდეს…

ისე, რომ ვთქვათ გულახდილად,
არც ადარდებს მომცრო ბინა,

რომ იტყვიან, თავი მუდამ
სახლში აქვს და რაღა უნდა.

ვასილ გულეური